Ustad Əfrahim Abbasın 75 illik yubileyi və kitab təqdimatı
Cəlilabadda ədəbi tədbir
(Ustad Əfrahim Abbasın 75 illik yubileyi və kitab təqdimatı)
Bu gün (10.06.2026) Cəlilabad şəhərində yerləşən “Tut Bağı” İstirahət Mərkəzində Cəlilabad ədəbi mühitinin görkəmli nümayəndəsi, Azərbaycan Yazıçılar Birliyi, Azərbaycan Jurnalistlər Birliyi və Turan Yazarlar Birliyinin üzvü, Prezident mükafatçısı, Ümumrespublika ədəbi müsabiqəsinin qalibi, “Qızıl Qələm” Media Mükafatı, TYB-nin xısusi ödülü, “Həməşəra” və “Nizami Gəncəvi” Fəxri Diplomları və “Turan Ödülü” laureatı, veteran pedaqoq, ədəbiyyatşünas, yazıçı-publisist, esseist, ustad şairimiz Əfrahim Abbasın doğum günü, 75 illik yubileyi və yenicə işıq üzü görmüş “Dünya mənim içimdədir” adlı şeirlər və qəzəllər kitabının təqdimat mərasimi keçirildi.
Cəlilabad rayonunun tanınmış ziyalıları, Cəlilabad ədəbi mühitinin bir qrup nümayəndələri, Azərbaycan Yazıçılar Birliyi və Turan Yazarlar Birliyinin bir qrup üzvləri, şəhid ailələri, habelə yazıçı və şairlərin, ədəbi təhlilçi, tənqidçi və ictimaiyyət nümayəndələrinin iştirakı ilə yüksək səviyyədə və səmimi aurada keçirilən tədbir vətən və dövlətçilik uğurunda canından keçmiş şəhidlərimizin əziz xatirəsinin anılması məqsədilə bir dəqiqəlik sükutla başladı, ardınca tədbir iştirakçıları öz çıxışında Ustad Əfrahim Abbasın ziyalı şəxsiyyəti, rayonun elm və təhsil, eləcə də ədəbi mühitinə xidmətlərindən söz açaraq onun ədəbiyyat sahəsindəki xüsusi bacarığı və ustad mövqeini yüksək qiymətləndirdilər. Bəzi çıxış edənlər isə həyatda ədəb və etikanın vazkeçilməz bir məsələ olduğunu önə çəkib, ədəbsiz və etikasız olan heç bir sahənin uğurlu və faydalı olmadığına təkid göstərdilər.
Tədbir boyu Ustad Əfrahim Abbasın qələmə aldığı şeirlərdən müəyyən nümunələr qiraət edildi, ardınca fəlsəfə üzrə fəlsəfə doktoru, “Həməşəra” mətbu orqanının təsisçisi və baş redaktoru, AJB, AYB və TYB-nin üzvü, TYB-nin İdarə Heyətinin üzvü, Turan Xalq yazarı, araşdırmaçı, tərcüməçi, yazıçı-publisist İlqar İsmayılzadə tərəfindən Ustad Əfrahim Abbasa 75 illik yubileyi və ədəbiyyat sahəsində xidmətlərinə görə “Nizami Gəncəvi” Fəxri Diplomu, Turan Yazarlar Birliyi tərəfindən ona verilmiş “Turan Xalq şairi” fəxri adına aid xüsusi lövhə, həmçinin, “Yazarlar” jurnalı tərəfindən göndərilmiş “Əsrin yazarı” medalı və medalın xüsusi vəsiqəsi təqdim edildi.
Bundan əlavə, tədbirdə Azərbaycan Dövlət Pedaqoji Universitetinin Cəlilabad filialının direktoru, Cəlilabad Rayon Ağsaqqallar Şurasının üzvü, aqrar elmlər üzrə fəlsəfə doktoru, dosent Xudayar Sultanlı tərəfindən fəxri Diplom və eləcə də, AYB və AJB-nin üzvü, “Sözün işığı” mətbu orqanının təsisçisi və baş redaktoru, Prezident təqaüdçüsü, Cəlilabad Rayon Veteranlar Təşkilatının sədri, şair-publisist Ədalət Salman tərəfindən Cəlilabad Rayon Veteranlar Təşkilatının Fəxri fərmanı, həmçinin digər iştirakçılar tərəfindən müəyyən hədiyyələr təqdim olundu.
Ustad şair Əfrahim müəllim öz çıxışında ona göstərilən sayğı və diqqətə görə tədbir iştirakçılarına, “Həməşəra” mətbu orqanı, Turan Yazarlar Birliyi və “Yazarlar” jurnalının rəhbərliyinə səmimi minnətdarlığını, bütün tədbir iştirakçılarından razılığını bildirdi..
Bu tədbirdə ustad şairin yenicə nəfis şəkildə nəşr edilmiş sayca doqquzuncu şeirlər və qəzəllər kitabından tədbir iştirakçılarına hədiyyə olundu. Tədbir xatirə şəkillərinin çəkilişi ilə yekunlaşdı. Fotolar:
“Yazarlar” olaraq həmkarımız ƏFRAHİM ABBASı təbrik edir, bütün həyat və fəaliyyətində yeni-yeni nailiyyətlər arzulayırıq! Uğurlarınız bol olsun! Xeyirli olsun!
Məlumatı hazırladı: Leyla Mahirqızı
Oxuyun >> Gözündə tük var
Zaur Ustacın şeirləri haqqında