Türk Dünyasının Birlik və Bərabərlik Nümayişi

V Milli Yaylaq Festivalı – Keçmişdən Gələcəyə Uzanan Mədəniyyət Körpüsü

Tarix yalnız kitablarda yazılan hadisələrdən ibarət deyil. Tarix, xalqın yaddaşında yaşayan adətlər, sazın tellərində səslənən nəğmələr, at kişnərtisində, oba ocağının tüstüsündə, yaylaq çiçəklərinin ətrində və milli ruhun yaşadığı hər məkanda öz nəfəsini qoruyub saxlayır. Məhz bu ruhun yaşadıldığı müqəddəs məkanlardan biri də Azərbaycanın füsunkar təbiət guşəsi olan Göygöl rayonunun ecazkar Xan Yaylağında yerləşən “Xan Yurdu” Etnoqəsəbəsi oldu.

2026-cı ilin 24–26 iyul tarixlərində keçirilən V Milli Yaylaq Festivalı təkcə bir mədəni tədbir deyil, Türk dünyasının birlik, həmrəylik və qardaşlıq manifestinə çevrildi. Burada əsrlərin səsi duyuldu, qədim elat həyatının nəfəsi hiss olundu, Türkün keçmişi ilə bu günü eyni ocaq başında qovuşdu.

Yaylaq türk insanı üçün yalnız yay məskəni olmayıb. O, azadlığın, mərdliyin, təbiətlə vəhdətin, halal zəhmətin və ailə birliyinin simvoludur. Min illər boyu Türk ellərinin həyat tərzi məhz yaylaqlarda formalaşmış, burada dastanlar yaranmış, igidlər yetişmiş, sazın sədası ilə könüllər birləşmişdir. Bu səbəbdən Yaylaq Festivalı sadəcə qədim ənənələrin nümayişi deyil, milli kimliyimizin gələcək nəsillərə ötürülməsi missiyasını daşıyır.

Festival çərçivəsində keçirilən möhtəşəm konsert proqramları, folklor nümunələri, xalq oyunları, milli musiqilər və rəngarəng sərgilər Azərbaycanın zəngin mədəni irsini Türk dünyasının müxtəlif guşələrindən gələn qonaqlarla bir araya gətirdi. Qardaş ölkələrdən gələn sənətkarlar, rəqs kollektivləri və musiqiçilər öz milli dəyərlərini təqdim etməklə bir daha göstərdilər ki, dillərimizdə müəyyən fərqlər olsa da, ürəklərimizin dili birdir.

Festivalın ən təsirli məqamlarından biri qədim Türk döyüş ənənələrinin nümayişi idi. Alpaqut döyüş sənəti, ənənəvi oxçuluq, atüstü oyunlar – çövkən, sürpapaq, eləcə də zorxana nümayişləri qədim Türk ərənlərinin igidliyini, cəsarətini və mənəvi gücünü yenidən yaşatdı. Bu səhnələr yalnız tamaşa deyildi; onlar Türkün minillik hərb tarixinin, şərəf və qeyrət məktəbinin canlı dərsi idi.

Xan Yaylağının saf havasında dalğalanan Türk dövlətlərinin bayraqları sanki tarixə bir mesaj verirdi: Türk dünyasının gücü onun birliyindədir. Ortaq kökdən boy atan xalqların bir araya gəlməsi, ortaq tarixini, mədəniyyətini və mənəvi dəyərlərini birlikdə yaşatması gələcək nəsillər üçün ən qiymətli mirasdır.

Bu festival göstərdi ki, mədəniyyət xalqları birləşdirən ən möhkəm körpüdür. Bir saz havası, bir xalça naxışı, bir at nalının səsi bəzən uzun çıxışlardan daha təsirli olur. Çünki ortaq yaddaş millətləri bir-birinə bağlayan görünməz, lakin qırılmaz bağdır.

Bizim də bu möhtəşəm tədbirdə iştirak etməyimiz böyük qürur və mənəvi zənginlik bəxş etdi. Festival boyunca hiss etdik ki, Türk dünyasının hər guşəsindən gələn insanların baxışlarında eyni sevgi, eyni tarix və eyni gələcək arzusu yaşayır. Bu birlik ruhu yalnız bugünün deyil, sabahın da təminatıdır.

V Milli Yaylaq Festivalı bir daha sübut etdi ki, milli-mənəvi dəyərlərini qoruyan xalqlar heç zaman tarix səhnəsindən silinmirlər. Keçmişini unutmayan millət gələcəyini də inamla qurur. Türk dünyasının ortaq irsi, ortaq ruhu və ortaq idealları yaşadıqca bu birlik daha da möhkəmlənəcək, yeni nəsillərə işıq olacaqdır.

Qoy Xan Yaylağında alovlanan bu birlik tonqalı heç vaxt sönməsin. Qoy Türk ellərinin sazı həmişə eyni havanı çalsın, bayraqları eyni səma altında qürurla dalğalansın. Çünki tarix bizə öyrədir ki, bir olan millət yenilməz, kökünə sahib çıxan xalq isə əbədidir.

Xan Yaylağından Yüksələn Türk Birliyinin Səsi

Bəzən bir dağın zirvəsində yandırılan tonqal, min kilometrlərlə uzaqda yaşayan qardaş ellərin ürəyini isidir. Xan Yaylağında alovlanan ocaq da məhz belə bir ocaq idi. Bu alov yalnız odunların yanması deyildi; o, əsrlərin yaddaşını, Oğuzun nəfəsini, Dədə Qorqudun öyüdlərini, Alp Ər Tonqanın igidliyini, Bilgə Xaqanın dövlətçilik ruhunu yenidən alovlandırırdı.

Türk dünyasının müxtəlif guşələrindən gələn nümayəndələrin eyni meydanda bir araya gəlməsi göstərdi ki, zaman və məsafələr bizi ayıra bilməz. Bizim kökümüz birdir, tariximiz birdir, sevincimiz və kədərimiz birdir. Altaylardan Anadoluya, Qarabağdan Türküstana, Qaqauz elindən Kərkükə, Krımdan Balkanlara qədər uzanan böyük Türk coğrafiyası eyni mənəvi dəyərlərin daşıyıcısıdır.

Bu festival həm də Azərbaycanın Türk dünyasının mədəni birliyinə verdiyi töhfənin parlaq nümunəsidir. Azərbaycan hər zaman ortaq tarixə, ortaq mədəniyyətə və ortaq gələcəyə xidmət edən layihələrin önündə dayanmışdır. V Milli Yaylaq Festivalı da bu siyasətin və milli düşüncənin təntənəsi kimi yaddaşlara həkk olundu.

Yaylaqda qurulan hər alaçıq qədim elat həyatının canlı muzeyi idi. Hər xalça ilməsində analarımızın zəhməti, hər mis qabda ustalarımızın sənəti, hər saz havasında xalqımızın ruhu yaşayırdı. Qonaqlar yalnız bir festival izləmirdilər; onlar minillik Türk sivilizasiyasının canlı salnaməsini görürdülər.

İdman yarışlarında nümayiş etdirilən çeviklik, cəsarət və döyüş ruhu qədim Türk hərb məktəbinin bu gün də yaşadığını göstərdi. Alpaqut döyüş sənəti, oxçuluq, atüstü oyunlar və zorxana nümayişləri gənclərə təkcə fiziki gücü deyil, eyni zamanda vətənə sədaqəti, mənəvi saflığı və yüksək əxlaqı aşılayırdı. Çünki Türk üçün qüvvət yalnız qol gücü deyil, vicdan, ədalət və mərhəmətlə tamamlanan mənəvi bütövlükdür.

Bu möhtəşəm festivalın ən böyük qazancı isə insanların qəlbində yaratdığı birlik hissi oldu. Fərqli ölkələrdən gələn insanlar ayrılarkən artıq bir-birini qonaq deyil, doğma qardaş və bacı kimi qucaqlayırdılar. Mədəniyyətin yaratdığı bu könül körpüləri siyasi sərhədlərdən daha möhkəm, zamanın sınaqlarından daha davamlıdır.

Əminik ki, V Milli Yaylaq Festivalı gələcək illərdə daha geniş miqyas alacaq, Türk dünyasının mədəni inteqrasiyasına yeni nəfəs verəcək və gələcək nəsillərə öz kimliyini unutmamağın ən gözəl örnəyi olacaqdır.

Çünki Türk dünyasının sabahı yalnız iqtisadi və siyasi əməkdaşlıqla deyil, ortaq tarixini, dilini, mədəniyyətini və mənəvi dəyərlərini yaşadan xalqların birliyi ilə daha da qüdrətlənəcək.

Yaşasın Azərbaycan! Yaşasın Türk Dünyasının sarsılmaz birliyi! Tanrı Türkü qorusun, Türk birliyini əbədi etsin!

Müəllif:
Qazeteçi,şair,araşdırmaçı yazar, AJB üzvü,zefernews.az saytının rəhbəri, “Zəfər Yolu “İctimai birliyinin sədri, Dünya Afşarlar Dərnəyinin Azərbaycan Təmsilçisi.Türkiyənin Anasan Yazarlar Birliyinin,Daqistan Respublikası Ədəbiyyatçılar Birliyinin,Azərbaycan Təmsilçisi,Turan Yazarlar Birliyinin üzvü Pərvanə Salmanqızı Abdullayeva