BAYRAĞIM — MİLLİ QÜRURUM, DÖVLƏTÇİLİYİMİN ƏBƏDİ RƏMZİ!

9 Noyabr — Dövlət Bayrağı Günü

Bayraq… Bu sözün arxasında bir xalqın tarixi, yaddaşı, mübarizəsi, qanı, canı, arzuları və gələcəyə uzanan ümidləri dayanır. Bayraq sadəcə rənglərin bir parça üzərində birləşməsi deyil. Bayraq bir millətin kimliyi, dövlətin müstəqilliyi, xalqın iradəsi və Vətənə olan sonsuz məhəbbətinin təcəssümüdür.

Azərbaycan bayrağı isə bizim üçün daha böyük məna daşıyır. O, əsrlərin sınağından keçmiş milli ruhumuzun, azadlıq istəyimizin, dövlətçilik ənənələrimizin və yenilməz xalq iradəmizin simvoludur.

1918-ci il mayın 28-də Azərbaycan Xalq Cümhuriyyətinin yaradılması ilə xalqımız Şərqdə ilk demokratik respublikalardan birinin qurucusu oldu. Həmin il noyabrın 9-da Azərbaycan Xalq Cümhuriyyəti hökumətinin qərarı ilə üçrəngli Dövlət Bayrağımız qəbul edildi.

Bu bayrağın hər rəngi özündə dərin fəlsəfə və milli ideya daşıyırdı. Mavi rəng türkçülüyü, qırmızı rəng müasirliyi, inkişafı və demokratik dəyərləri, yaşıl rəng isə islam sivilizasiyasına mənsubiyyətimizi ifadə edirdi.

Bu üç rəng bir araya gələrək xalqımızın milli kimliyini, mənəvi dünyasını və gələcəyə baxışını əks etdirən əbədi bir ideyaya çevrildi.

1920-ci ildə Azərbaycan Xalq Cümhuriyyətinin süqutundan sonra üçrəngli bayrağımız dövlət rəmzi kimi dalğalanmasını dayandırsa da, xalqımızın yaddaşından heç vaxt silinmədi. Çünki bayraqlar bəzən meydanlardan endirilə bilər, lakin millətin qəlbindən endirilə bilməz.

70 ildən artıq davam edən sovet hakimiyyəti illərində belə milli istiqlal düşüncəsi yaşadı. 1990-cı il noyabrın 17-də Ulu Öndər Heydər Əliyevin təşəbbüsü və rəhbərliyi ilə Naxçıvan Muxtar Respublikasının Ali Məclisində üçrəngli bayrağımız yenidən dövlət bayrağı kimi qəbul edildi.

1991-ci il fevralın 5-də Azərbaycan Respublikasının Ali Soveti üçrəngli bayrağımızı dövlət bayrağı kimi təsdiq etdi. Müstəqil Azərbaycan öz milli rəmzinə yenidən qovuşdu.

2009-cu ildə Prezident İlham Əliyevin imzaladığı sərəncamla 9 noyabr Dövlət Bayrağı Günü elan edildi.

Bu tarix yalnız bir bayram deyil, milli yaddaşımızın, istiqlal mübarizəmizin və dövlətçilik tariximizin təntənəsidir.

Bayraq Vətənin göylərə yazılmış adıdır!

Azərbaycan bayrağı bu gün azad torpaqlarımızın üzərində qürurla dalğalanır. Qarabağda, Şuşada, Xankəndidə, Xocalıda və Azərbaycanın hər qarışında dalğalanan üçrəngli bayrağımız xalqımızın tarixi iradəsinin, qəhrəmanlığının və Zəfərinin rəmzidir.

44 günlük Vətən müharibəsində Azərbaycan əsgərinin göstərdiyi qəhrəmanlıq, şəhidlərimizin müqəddəs fədakarlığı və qazilərimizin iradəsi bayrağımızın şərəfini daha da ucaltdı.

O bayraq ki, bir zamanlar azadlıq arzusu ilə dalğalanırdı, bu gün suverenliyimizin və dövlət müstəqilliyimizin təcəssümüdür.

Biz bayrağa baxanda yalnız rəngləri görmürük. Mavi rəngdə kökümüzü, qırmızı rəngdə inkişaf yolumuzu, yaşıl rəngdə mənəvi dəyərlərimizi görürük. Aypara və səkkizguşəli ulduz isə milli rəmzlərimizin ayrılmaz hissəsi kimi bu müqəddəs mənzərəni tamamlayır.

Bayrağa hörmət etmək Vətənə hörmət etməkdir. Onu qorumaq dövlətçiliyi qorumaq, ucalığını yaşatmaq isə gələcək nəsillərə müstəqil Azərbaycan miras qoymaq deməkdir.

Hər bir azərbaycanlının qəlbində bir bayraq sevgisi, hər bir evdə bir Vətən sevgisi, hər bir gələcək nəslin düşüncəsində isə müstəqil dövlətçilik məsuliyyəti yaşamalıdır.

Unutmayaq ki, bayraqlar yalnız dirəklərdə deyil, insanların vicdanında, düşüncəsində və əməlində də ucalmalıdır.

Bu gün üçrəngli bayrağımızın kölgəsində yaşayan hər bir vətəndaş bilməlidir ki, müstəqillik bizə miras qalmış adi bir nemət deyil, böyük mübarizələrin, fədakarlıqların və tarixi qurbanların nəticəsidir.

Bayrağımız ucaldıqca Azərbaycan ucalır! Azərbaycan yaşadıqca üçrəngli bayrağımız əbədi dalğalanacaq!

9 Noyabr — Dövlət Bayrağı Günü münasibətilə bütün Azərbaycan xalqını ürəkdən təbrik edir, dövlətimizin müstəqilliyinin, suverenliyinin və ərazi bütövlüyünün daim qorunmasını arzulayıram.

Bu müqəddəs bayraq uğrunda canından keçən şəhidlərimizin əziz xatirəsini dərin ehtiramla yad edir, qazilərimizə sağlamlıq və uzun ömür diləyirəm.

Qoy üçrəngli bayrağımız daim zirvələrdə dalğalansın, Azərbaycanımızın səması həmişə aydın, gələcəyi parlaq olsun!

Yaşasın müstəqil Azərbaycan!
Yaşasın Azərbaycan xalqı!
Yaşasın üçrəngli, müqəddəs Dövlət Bayrağımız!

ŞANIM-ŞÖHRƏTİM,
AZƏRBAYCANIM.

Bu gün sənin bayramındır,
Doğma Azərbaycanım.
Xoşbəxt günlər məqamındır,
Şanlı Azərbaycanım.

Sərbəst bir ölkəsən,
Uğurların böyükdür.
Zəfərlərdən doğan
Canım Azərbaycanım.

Dirəyindir hər övladın,
Şərəfinlə sən uçaldın.
Dünyaya səs salıb adın,
Yurdum Azərbaycanım.

Yoxdur tənin,saf niyyətin,
Qızın ilə oğlun mətin
Şərəfindir,söz haqqındır,
Doğma Azərbaycanım.

Tənin yoxdur,zəfər çaldın,
Sən adınla lap uçaldın.
Zirvədədir al Bayrağın,
Şanım-şöhrətim,Azərbaycanım.
18.10.2021

Müəllif:
Qazeteçi,şair,araşdırmaçı yazar, AJB üzvü,zefernews.az saytının , TV-NİN rəhbəri, “Zəfər Yolu” İctimai birliyinin sədri, Dünya Afşarlar Dərnəyinin Azərbaycan Təmsilçisi,Türkiyənin Anadolu Ölümsüz Kahramanlar Konfederasiyasının Azərbaycan Təmsilçisi, Türkiyənin Anasan Yazarlar Birliyinin,Daqistan Respublikası Ədəbiyyatçılar Birliyinin,Azərbaycan Təmsilçisi,Turan Yazarlar Birliyinin üzvü,”XXI Əsrin Ziyalıları Zirvəsi” Platformasının təsisçisi və direktoru
Pərvanə Salmanqızı Abdullayeva.