Astara Rayon İcra Hakimiyyətinin başçısı Qəzənfər Ağayev Vinq Çun kontakt üzrə yeniyetmələr arasında Dünya çempionu Axundov Məhəmmədəli Ceyhun oğlunu qəbul etmişdir.

Zefernews.az xəbər verir ki,

Görüş zamanı İcra başçısı Prezident İlham Əliyevin rəhbərliyi ilə Azərbaycanın dünyada  idman ölkəsi kimi tanındığı, ölkəmizdə idmanın inkişafı və idmançılara yaradılan yüksək şəraitdən yararlanan gənclərimizin müxtəlif beynəlxalq yarışlarda uğurlar qazanması, Azərbaycan bayrağını yüksəklərə qaldırmasından söhbət açıb.

Məhəmmədəli Axundovun idman həyatında  ən böyük uğuru- 14-18 avqust 2023-cü il tarixlərdə Çin Xalq Respublikasının Honkonq şəhərində keçirilən Çin Döyüş Növləri üzrə 15-ci Beynəlxal Festival və Vinq-Çun üzrə 11-ci Dünya çempionatında yeniyetmələr arasında Vinq-Çun (kontakt) üzrə Dünya çempionu adını və qızıl medal qazanmasıdır. İdmançı 2008-ci ildə Astara rayonunun Ərçivan qəsəbəsində anadan olub. 2013-cü ildən idmanın Uşu-sandu idman növü ilə məşğuldur. Bu idman növü üzrə Respublika çempionu olmuşdur.

Hazırda Azərbaycan Vinq Çun Federasiyasının və Azərbaycan yığma komandasının tərkibində məşqçi-müəllim Asif Sayadovun rəhbərliyi altında məşq edən Məhəmmədəli Axundov bu ilin noyabrında Yunanıstanda keçiriləcək Avropa çempionatına hazırlaşır.

Görüşün sonunda İcra başçısı Qəzənfər Ağayev Məhəmmədəli Axundovu  təbrik etmiş, ona gələcək yarışlarda uğurlar diləmiş, Fəxri Fərman və qiymətli hədiyyə ilə mükafatlandırmışdır.