Əbədiyyətə Yazılan Xeyirxahlıq Manifesti- Ağamusa Nağıyev

Əbədiyyətə Yazılan Xeyirxahlıq Manifesti- Ağamusa Nağıyev
Azərbaycanın tarix səmasında elə ulduzlar var ki, onlar bir anlıq parlayıb sönmürlər, əksinə əsrlərin qaranlığını yararaq işıq saçırlar. O ulduzların adı nə kağızda solur, nə də yaddaşdan silinir. Onlar zamanın sərt küləklərinə sinə gərərək qərinələrin yaddaşında yaşayır, millətin taleyinə çevrilirlər. Azərbaycanın tarixində adlarını zamanın daş yaddaşına həkk etmiş, böyük qərinələrin öz köksündə qoruyub saxlayacağı belə şəxsiyyətlərdən biri məşhur milyonçu Ağamusa Nağıyevdir.

O, sadəcə neft milyonçusu deyildi. O, torpaqdan qaynayan qara qızılı millətin gələcəyinə çevirməyi bacaran iradə sahibi idi. Onun həyatı zəhmətin poetik dastanı, iradənin səssiz fəlsəfəsi idi. Yoxsulluğun sərt qayalarından dırmaşaraq zirvəyə yüksəlmiş, lakin zirvədə dayanarkən belə köklərini unutmamışdı. Çünki onun üçün sərvət məqsəd deyil, vasitə idi — xalqına xidmət vasitəsi.

Bakının küçələrində ucalan möhtəşəm binalar onun düşüncəsinin daşlaşmış duaları kimidir. Hər eyvanında bir ümid, hər sütununda bir əzmkarlıq, hər pəncərəsində bir sabaha inam yaşayır. O tikililər sadəcə memarlıq nümunəsi deyil , onlar milli ruhun daşlaşmış manifestidir. Sanki şəhərin divarları belə onun zəhmətinin nəfəsini daşıyır.
Ağamusa Nağıyev anlayırdı ki, var-dövlət insanı böyütmür, onu böyüdən paylaşmaqdır. Xeyriyyəçilik onun üçün səs-küy deyil, səssiz vicdan çağırışı idi. O, sərvətini maarifə, inkişafa, şəhərin abadlığına yönəldərək zamanın içində özünə əbədiyyət qazandı. Çünki tarix yalnız qazananları deyil, qazandığını xalqına qaytaranları sevir.
Bu gün onun irsinin yenidən üzə çıxarılması, fəaliyyətinin daha dərindən araşdırılması, xeyriyyəçilik missiyasının gənc nəslə tanıdılması böyük bir mənəvi hadisədir. Bu istiqamətdə görülən işlər isə sadəcə elmi araşdırma deyil, bu, milli yaddaşın dirçəldilməsidir. Xüsusilə onun nəvəsi Dilarə xanım Nağıyevanın bu müqəddəs irsin işıqlandırılması, tanıdılması və yaşadılması istiqamətində gördüyü işlər böyük ehtirama layiqdir.
Bu fəaliyyət bir ailənin tarixi marağı deyil, bu, bir millətin öz köklərinə qayıdışıdır. Dilarə xanımın gördüyü işlər göstərir ki, irs yalnız maddi miras deyil, mənəvi məsuliyyətdir. Böyük adın yükünü daşımaq cəsarət tələb edir və bu cəsarət onun fəaliyyətində aydın görünür. Ona bu şərəfli missiyada yeni uğurlar, yeni zirvələr arzulayırıq.

Lakin unutmamalıyıq ki, Ağamusa Nağıyev kimi şəxsiyyətlər yalnız bir nəslin deyil, bütün Azərbaycanın ortaq mənəvi sərvətidir. Onların adını yaşatmaq, xatirəsini uca tutmaq, fəaliyyətini gələcək nəsillərə ötürmək hər bir azərbaycanlının borcudur. Çünki biz tarixə bağlıyıq. Biz onun davamıyıq. Biz bu böyük səhnədə bir gün obrazdan tarixə çevriləcək insanlarıq. Tarix isə yalnız xatırlananları yaşadır.
Ağamusa Nağıyev – zəhmətin heykəlləşmiş əzəməti, səxavətin səssiz nidası, milli ruhun sarsılmaz sütunudur. Onun adı zamanın axarında itib-batmır, əksinə, daha gur səslə səslənir.

Bu yazı onun əziz xatirəsinə, anım gününə ithaf olunur.
Ruhu şad, adı əbədi olsun!