30 İyun – Əbədi Sevginin Zəfər Günü

Tarix yalnız müharibələrin, qələbələrin və dövlətlərin salnaməsi deyil. Tarix, həm də sevginin zaman üzərində qazandığı qələbələrin yaddaşıdır. Azərbaycan xalqının qəlbində elə sevgi dastanları var ki, onlar təkcə iki insanın taleyi deyil, bütöv bir millətin mənəvi sərvətinə çevrilib. Bu dastanların ən müqəddəslərindən biri İlham və Fərizə Allahverdiyevlərin ömür yoludur.

Onların sevgisi adi bir ailə həyatının başlanğıcı kimi doğuldu. 30 iyun tarixində qurulan bu ailə yalnız iki gəncin xoşbəxtlik arzusu deyildi. Bu sevgi sonradan Vətən sevgisi ilə qovuşaraq əbədiyyət qazandı.

1990-cı ilin Qanlı Yanvar faciəsi Azərbaycan tarixinin ən ağrılı səhifələrindən biri oldu. Azadlıq uğrunda canından keçən yüzlərlə şəhid arasında İlham Allahverdiyev də vardı. O, Vətən sevgisini həyatından üstün tutaraq şəhidlik zirvəsinə yüksəldi.

Bu ağır itki Fərizə xanımın həyatını da dəyişdirdi. O, həyat yoldaşından ayrı yaşamağı qəbul etmədi. Bir gün sonra – 21 yanvar tarixində o da əbədiyyətə qovuşdu. Beləliklə, onların sevgisi ölümün belə ayıra bilmədiyi müqəddəs bir bağa çevrildi.

İlham və Fərizə Allahverdiyevlər bu gün yalnız bir ailə cütlüyü kimi deyil, sədaqətin, vəfanın, fədakarlığın və əbədi məhəbbətin rəmzi kimi xatırlanırlar. Onların yanaşı uyuduqları Şəhidlər Xiyabanı milyonlarla insan üçün həm Vətən sevgisinin, həm də saf məhəbbətin müqəddəs ünvanıdır.

2004-cü ildən etibarən onların toy günü – 30 iyun Azərbaycanda qeyri-rəsmi olaraq Sevgililər Günü kimi qeyd olunur. Bu gün dünyaya göstərir ki, sevgi yalnız hədiyyələr, güllər və gözəl sözlər deyil. Əsl sevgi sədaqətdir, etibardır, fədakarlıqdır və ən çətin anda belə yarı yolda qoymamaqdır.

İlham və Fərizənin hekayəsi sübut edir ki, həqiqi sevgi zamanla köhnəlmir, məsafə ilə itmir, ölüm qarşısında məğlub olmur. Çünki sevgi cismlərdə deyil, ruhlarda yaşayır. Ruhlar isə əbədidir.

Bu müqəddəs sevgi dastanı gələcək nəsillərə insan olmağın, sevməyin, sədaqətli qalmağın və Vətəni sevməyin ən gözəl nümunəsini öyrədir. Onların adı çəkiləndə insan anlayır ki, sevginin ən uca zirvəsi fədakarlıq, ən gözəl tacı isə vəfadır.

Bu gün İlham və Fərizəni ehtiramla anarkən, onların xatirəsi qarşısında baş əyir, bütün şəhidlərimizi dərin hörmət və minnətdarlıqla yad edirik.

Ruhunuz şad olsun, əziz şəhidlər! Siz təkcə Azərbaycan tarixinin deyil, Azərbaycan sevgisinin də əbədi simvolusunuz. Sevginiz zamanın yaddaşına həkk olunmuş müqəddəs bir dastan kimi daim yaşayacaq və nəsildən-nəslə ötürüləcək.

Müəllif:
Pərvanə Salmanqızı
Jurnalist, şair,araşdırmaçı yazar.