Əs, ey külək, əs, ey külək!
ƏS, EY KÜLƏK!
Əs, ey külək, əs, ey külək!
Hər tərəfə xoşbəxtlik yay.
Bizi tapsın o saf dilək,
Dünyamıza nur saçsın ay.
Gözlərində sevgi yansın,
Ürək vursun pərvanətək.
Qoy bu dünya soraqlansın,
Bizim xəyal dünyamıztək.
Əs, ey külək, apar bizi,
O sonsuz sevgi bağına.
Sil ürəkdən hər bir izi,
Qovuşdur arzu dağına.
GÖZƏL BAKIM
Səhər açır pəncərəni yeliylə,
Salamlayır Bakı bizi sevgiylə.
Kiçik, şirin möcüzəli sehriylə,
Unutdurur dərdi, qəmi eşqiylə.
Dəniz mehi və isti çay,
Həyat verib bizə bir pay.
Səndən başqa yoxdur bir tay,
Gülüşünü dünya duyar, gözəl Bakım!
Gecələr parlayır işıqlarıyla,
Xəzər dalğalanır öz sularıyla.
Sevgimiz yayılır mahnılarıyla,
Yeni dastan yazır arzularıyla.
SEVDALI RUHLAR
Ruhumuz birləşib sevgiyə döndü,
Cismən ayırdılar, sanki ruh öldü.
Səmada parlayan günəşin, ayın,
Sandılar şəfəqi sonadək söndü.
Hamı sevdamıza qarşı gəlsə də,
Sevgimiz qovuşub həsrəti böldü.
Zaman tabe oldu ruhun səsinə,
Qayıtdıq biz eşqin ilk nəfəsinə.
Məsafə əyildi sevgi önündə,
Çünki ruhumuzda sönmədi o köz.
Bitdi, demişdilər bu böyük sevda,
Amma sadiq qaldı verdiyimiz söz.
Müəllif: D.Mirzə
Oxuyun >> Gözündə tük var
Zaur Ustacın şeirləri haqqında