ELMİN İŞIĞINDA YÜKSƏLƏN ÖMÜR YOLU – PROFESSOR CAVİD QASIMOV

Tarix xalqların yaddaşı, dövlətlərin isə mənəvi pasportudur. Bu yaddaşı qoruyan, araşdıran və gələcək nəsillərə çatdıran alimlər isə cəmiyyətlərin ən qiymətli sərvətlərindən hesab olunur. Belə elm adamlarından biri də tarix elmləri doktoru, professor, görkəmli şərqşünas alim Cavid Əhməd oğlu Qasımovdur.

1 iyun 1976-cı ildə dünyaya göz açan Cavid Qasımov hələ gənclik illərindən elmə, tarixə və Şərq mədəniyyətinə böyük maraq göstərmişdir. Bakı Dövlət Universitetinin Tarix-Şərqşünaslıq fakültəsində aldığı yüksək səviyyəli təhsil onun gələcək elmi fəaliyyətinin möhkəm təməlini formalaşdırmışdır. Universiteti fərqlənmə diplomu ilə bitirməsi, magistratura və daha sonra doktorantura təhsilini uğurla davam etdirməsi onun elmə olan sonsuz sevgisinin və zəhmətinin bariz nümunəsidir.

Professor Cavid Qasımovun həyat yolu sadəcə bir alim ömrü deyil, həm də tarixə xidmət edən böyük bir missiyanın təcəssümüdür. O, Osmanlı dövlətçilik ənənələrinin, idarəetmə sisteminin, siyasi institutlarının və Yaxın Şərq tarixinin araşdırılması sahəsində mühüm elmi nəticələr əldə etmişdir. Xüsusilə Osmanlı paleoqrafiyası və diplomatikası sahəsində qazandığı bilik və təcrübə onu bu istiqamətin seçilən mütəxəssislərindən birinə çevirmişdir.

Türkiyənin nüfuzlu universitetlərində keçdiyi elmi təcrübələr, Osmanlı arxivlərində apardığı tədqiqatlar və minlərlə tarixi sənəd üzərində həyata keçirdiyi araşdırmalar nəticəsində tarixşünaslıq elminə qiymətli töhfələr vermişdir. Onun araşdırmaları yalnız keçmişin öyrənilməsinə deyil, həm də dövlətçilik ənənələrinin, idarəçilik mədəniyyətinin və tarixi təcrübələrin müasir dövr üçün əhəmiyyətinin dərk edilməsinə xidmət edir.

Professor Cavid Qasımovun fəaliyyəti Azərbaycan və Türkiyə arasında elmi-mədəni əlaqələrin inkişafında da mühüm rol oynayır. O, hər iki qardaş ölkənin ortaq tarixi irsinin araşdırılması və təbliği istiqamətində ardıcıl fəaliyyət göstərərək türk dünyasının elmi inteqrasiyasına öz dəyərli töhfəsini verməkdədir.

Alimin zəngin dil biliyi – türk dili, Osmanlı türkcəsi, ərəb, fars, rus və fransız dillərinə mükəmməl yiyələnməsi ona müxtəlif mənbələri orijinaldan araşdırmaq imkanı yaratmış, elmi fəaliyyətinin coğrafiyasını daha da genişləndirmişdir.

Bu gün Van Yüzüncü Yıl Universitetində professor kimi fəaliyyət göstərən Cavid Qasımov yüzlərlə tələbənin, magistrantın və doktorantın elmi formalaşmasında mühüm rol oynayır. Onun yetişdirdiyi gənc tədqiqatçılar gələcəyin elm adamları kimi tarix və şərqşünaslıq elminin inkişafına xidmət edirlər.

Elm yolunda qazanılan uğurlar təsadüf deyil. Bu uğurların arxasında illərin zəhməti, yorulmaz araşdırmalar, vətənə və elmə sədaqət dayanır. Professor Cavid Qasımovun həyat yolu da məhz bu ali dəyərlərin parlaq nümunəsidir.

Bu əlamətdar gündə – doğum günü münasibətilə hörmətli professor Cavid Əhməd oğlu Qasımovu ürəkdən təbrik edir, ona möhkəm cansağlığı, uzun ömür, yeni elmi nailiyyətlər, pedaqoji fəaliyyətində uğurlar və həyatının bütün sahələrində xoşbəxtlik arzulayırıq.

Qoy zəngin elmi fəaliyyəti gələcək nəsillər üçün daim örnək olsun, qələmi hər zaman tarixə işıq saçsın, adı elm və ziyalılıq zirvəsində daim uca səslənsin.

Doğum gününüz mübarək olsun, dəyərli Cavid müəllim!

Dərin hörmət və ehtiramla,

Pərvanə Salmanqızı Abdullayeva
Qazeteçi,şair-yazar.