Dost gəlişi bayram oldu

Dost gəlişi bayram oldu

3 aprel 2026-cı il. Dost gəlişi bayram oldu həmin gün. Azərbaycan Yazıçılar Birliyinin Natəvan zalında Özbəkistan, Qırğızstan və Tacikistandan gələn şair və nasirlərlə keçirilən görüş son günlərin ən yaddaqalan tədbirlərindən idi. Görüşdə”Turan ədibləri-3” antologiyası iştirakçılara təqdim olundu. Həmin topluya uğurlama yazmış AYB katibi, tanınmış şair, tərcüməçi, esseist Səlim Babullaoğlu tədbiri açaraq qonaqları salamladı.

O, bu görüşün və ərsəyə gələn antologiyanın türkdilli qardaş ölkələrin ədəbi əlaqələrinin daha da möhkəmlənməsində əhəmiyyətini vurğuladı, yazıçı birliklərinin bu yöndə ardıcıl fəaliyyətini qeyd etdi.
Tədbirin moderatoru, AYB-nin Bədii Tərcümə və Ədəbi Əlaqələr Mərkəzinin sədri, ədəbi tənqidçi Əsəd Cahangir Turan ellərindən olan söz adamlarının, həmçinin azərbaycanlı yazarların bu topluda bir araya gəldiyini söyləyərək, antologiyanın işıq üzü görməsində
redaktorlar və tərcüməçilər Mugimcan Nurboyev, Təranə Turan Rəhimli, Namiq Dəlidağlı, Nərgizaxon Ortiqova, Rəhmət Babacan və ümumən yaradıcı heyətin əməyini diqqətə çatdırdı. Qələm dostlarımız çıxış edərək qaşılıqlı ədəbi əlaqələrimiz və birgə layihələr barədə danışdılar.
Hazırda İzmirdə yaşayan və çalışan dəyərli qələm dostumuz, şair, tərcüməçi, filologiya elmləri doktoru, ədəbiyyatşünas Təranə Turan Rəhimli ilə görüşümüz tədbirin yaddaqalan anlarından idi.
Təşəkkürnamələr təqdim olundu. Xatirə şəkilləri dost görüşündən yadigardır: