Milli Təhlükəsizlik Orqanları İşçilərinin Peşə Bayramı

Hər bir dövlətin gücü təkcə onun iqtisadiyyatı və ya hərbi qüdrəti ilə ölçülmür. Dövlətin əsl qüvvəsi onun təhlükəsizliyində, sabitliyində və görünməz qəhrəmanlarının səssiz xidmətində gizlidir. Azərbaycanda hər il 28 mart tarixində qeyd olunan Milli Təhlükəsizlik Orqanları İşçilərinin Peşə Bayramı məhz bu fədakar insanların əməyinə verilən yüksək dəyərin təcəssümüdür.
Bu bayramın tarixi kökləri dövlətçilik ənənələrimizə dayanır. Azərbaycan Xalq Cümhuriyyəti dövründə milli təhlükəsizlik orqanlarının əsası qoyulmuş, sonrakı dövrlərdə isə bu sistem daha da təkmilləşərək müasir və peşəkar bir quruma çevrilmişdir. Bu orqanların əsas vəzifəsi dövlət müstəqilliyini qorumaq, milli maraqları müdafiə etmək, daxili və xarici təhlükələrin qarşısını almaqdan ibarətdir.
Milli təhlükəsizlik orqanlarında çalışan insanlar görünməz cəbhənin əsgərləridir. Onlar bəzən adları bilinmədən, simaları tanınmadan, səssiz və təmkinli şəkildə Vətənə xidmət edirlər. Onların işi yalnız peşə deyil — bu, bir ömürlük and, məsuliyyət və sədaqətdir. Hər bir əməkdaşın çiyinlərində dövlətin sabahı, xalqın əmin-amanlığı dayanır.
Bu peşə xüsusi cəsarət, yüksək intellekt, çevik düşüncə və sarsılmaz iradə tələb edir. Çünki təhlükə hər zaman açıq şəkildə görünmür. Bəzən o, gizli olur, mürəkkəb olur, lakin milli təhlükəsizlik əməkdaşlarının peşəkarlığı sayəsində vaxtında aşkarlanır və zərərsizləşdirilir.
Azərbaycanın müasir inkişaf yolunda təhlükəsizlik orqanlarının rolu danılmazdır. Dövlətçiliyimizin qorunması, ictimai sabitliyin təmin olunması, vətəndaşların təhlükəsiz həyatının təmin edilməsi məhz bu fədakar insanların sayəsində mümkün olur. Onlar gecə-gündüz demədən xidmət edir, Vətənin keşiyində dayanırlar.
Bu bayram həm də şəhid olmuş təhlükəsizlik əməkdaşlarının xatirəsinə ehtiram günüdür. Onların göstərdiyi qəhrəmanlıq, Vətənə olan sədaqət və fədakarlıq gələcək nəsillər üçün örnəkdir. Onların ruhu qarşısında baş əyir, xatirələrini dərin hörmətlə anırıq.
Milli təhlükəsizlik orqanlarının əməkdaşları — sizlər Vətənin səssiz qalxanı, görünməz sipərisiniz. Sizin sayənizdə xalqımız sabaha inamla baxır, ölkəmiz inkişaf edir və güclənir.
Bu əlamətdar gün münasibətilə bütün milli təhlükəsizlik orqanları işçilərini ürəkdən təbrik edir, onlara möhkəm can sağlığı, çətin və məsuliyyətli fəaliyyətlərində uğurlar arzulayırıq.
Vətənə xidmət edən hər bir insanın yolu daim açıq, qəlbi qürurlu olsun!

Pərvanə Salmanqızı
Jurnalist, şair-publisist.