Xalqına sevgi ilə xidmət edən bir ömür – Səadət Niyazova

Hər bir insanın ömrü bir kitab kimidir. Kimisi bu kitabı boş səhifələrlə doldurur, kimisi isə ömrünün hər səhifəsini işıqlı izlərlə yazır. Səadət Niyazova isə bu həyat kitabını zəhmətlə, fədakarlıqla, elmlə, xeyirxahlıqla və böyük ürək genişliyi ilə bəzəmiş dəyərli bir xanımdır.

17 avqust 1972-ci ildə dünyaya göz açan Səadət xanım, ilk gənclik illərindən elmə, təhsilə və insanlara xidmətə bağlılığı ilə seçilmişdir. Tibb Məktəbini və Gəncə Müəllimlər İnstitutunu fərqlənmə diplomları ilə bitirməsi onun çalışqanlığının və məqsədyönlü xarakterinin ən böyük sübutudur. Uzun illər tibb sahəsində, sahibkarlıq və network fəaliyyətlərində uğurla çalışaraq insanların sağlamlığına, inkişafına və rifahına yönəlmiş xeyirli işlər görmüşdür.

2012-ci ildən qəlbinin səsini dinləyən Səadət Niyazova yazıçı və jurnalist kimi də yeni bir yol açmış, “İnsan və Qanun” jurnalının redaktoru olaraq cəmiyyətin maariflənməsində mühüm rol oynamışdır. Onun oxuculara bəxş etdiyi əsərlər sırasında “Şəfalı Əllər” kitabı da var – bu kitab yalnız bir müəllifin zəhməti deyil, həm də insanlara şəfa, ümid və güvən bəxş edən bir ömür yolunun təcəssümüdür.

Səadət xanımın gördüyü işlər və qazandığı uğurlar təsadüfi deyil. O, həm Azərbaycanda, həm də beynəlxalq səviyyədə mükafatlara layiq görülmüş,”Zəfər Yolu ” İctimai birliyinin fəxri üzvü, Azərbaycan Sahibkar Qadınlar İctimai Birliyinin üzvü, Azərbaycan Vətən Müharibəsi Veteranları İctimai Birliyinin fəxri üzvü olmuşdur. Bu titullar və mükafatlar isə onun ömrünü yalnız özünə deyil, xalqına həsr etməsinin təntənəsidir.

Bu gün, doğum günündə Səadət xanımın timsalında biz yalnız bir xanımı deyil, elmə, sənətə, maarifə və vətənə xidmət edən böyük bir ürəyi təbrik edirik. Onun həyat yolu gələcək nəsillərə bir örnək, güc və ilham mənbəyidir.

Səadət xanım, yeni yaşınız sizə daha çox sevinc, daha çox uğur, daha çox sağlamlıq gətirsin. Xalqımıza etdiyiniz xidmətlər və yazdıqlarınız zamanın yaddaşında qalacaq, iziniz daim nurla dolu olacaq.

Doğum gününüz mübarək olsun, dəyərli Səadət xanım!

Sevgi və ehtiramla,
Pərvanə Salmanqızı