Qızıl Əllərin 30 İllik Yolu – İnsanlığa, Elmə və Fədakarlığa Sədaqət

Bu gün – 14 avqust – Azərbaycan təhsil məkanında xüsusi bir tarixdir. Çünki “Qızıl Əllər” MMC Təhsil Müəssisəsinin yaranmasından 30 il ötür. Bu illər sadəcə təqvimdə keçən zaman deyil – zəhmət, sevgi, elm və fədakarlıqla toxunmuş bir yolun hekayəsidir.

Bu yolun önündə dayanan, zəhmətini və ömrünü insanlara, xüsusilə gənclərin maariflənməsinə həsr edən Zemfira Ağayeva – “Qızıl Əllər” MMC-nin rəhbəri və Azərbaycan Sahibkar Qadınlar İctimai Birliyinin sədri – təhsilimizdə, sahibkarlıqda və qadın liderliyi sahəsində parlaq imza atmış bir ziyalıdır.

Zemfira xanımı tanıyan hər kəs onun sadəliyini, sədaqətliliyini, humanistliyini, fədakarlığını və yardımsevərliyini böyük ehtiramla qeyd edir. Onun üçün uğur – yalnız şəxsi nailiyyət demək deyil; uğur başqalarının həyatına işıq saçmaq, əllərindən tutub irəli aparmaqdır.

“Qızıl Əllər”in 30 illik fəaliyyəti ərzində minlərlə tələbə bilik qazanmış, öz həyat yolunu müəyyənləşdirmişdir. Bu müəssisə təkcə bir təhsil ocağı deyil – gənclərin gələcəyinə ümid, iş dünyasına bacarıqlı mütəxəssislər qazandıran bir məbədgahdır.

Zemfira Ağayeva Azərbaycan qadınının gücünü, iradəsini və mərhəmətini bir simada birləşdirərək sübut edib ki, əsl zəfər yalnız başqalarının uğurunda sevinməkdir. Onun rəhbərliyi ilə “Qızıl Əllər” bu gün də elmə, təhsilə, insanlığa xidmət missiyasını qürurla davam etdirir.

Bu yubiley münasibətilə Zemfira xanımı ürəkdən təbrik edir, ona möhkəm can sağlığı, yeni uğurlar və daha çox gəncin həyatına ilham verməsini arzulayıram.

İmza:Pərvanə Salmanqızı.