Yaxşı ki, məni seçib bu dünyaya gəlmisən…

Bəzən insan taleyi sadəcə bir zaman kəsişi kimi görür. Ancaq dərin düşünəndə anlayırsan ki, heç bir qarşılaşma təsadüf deyil, heç bir doğuluş səbəbsiz baş vermir. Hər ruh bu dünyaya gəlməzdən əvvəl bir yol seçir, bir missiya daşıyır və bəzən də bir başqa ruhu tapmaq üçün var olur.
“Yaxşı ki, məni seçib bu dünyaya gəlmisən…” cümləsi sadə bir sevinc ifadəsi deyil. Bu, varoluşun etirafıdır, taleyin səssiz razılaşmasıdır. Sanki ruhlar zamanın fövqündə bir yerdə dayanıb: “Biz eyni dövrdə, eyni dünyada, eyni ağrılar və ümidlər içində bir-birimizi tapacağıq” deyə sözləşiblər.
Tarix boyu insanlar bir-birinə bağlanıb: ana övlada, müəllim şagirdə, dost dosta, yol yoldaşa… Bu bağlar qanla deyil, ruh yaddaşı ilə qurulub. Çünki ruh tanıyanda sual vermir, tərəddüd etmir — sadəcə tanıyır. Elə buna görə də bəzən bir insanı ilk dəfə görəndə belə içində tanışlıq hissi yaranır. Bu, bədənin yox, ruhun xatırlamasıdır.
Bu dünyaya gəlmək yalnız nəfəs almaq deyil. Bu dünyaya gəlmək — sınanmaqdır, sevməkdir, yanılmaqdır, yenidən qalxmaqdır. Amma bəzi insanlar var ki, onların gəlişi bir başqasının həyatını mənalandırır. Onlar yolumuza işıq, qəlbimizə istiqamət olur. Elə bil Tanrı deyir: “Tək deyilsən, sənə yoldaş göndərdim.”
“Yaxşı ki, məni seçib bu dünyaya gəlmisən” demək, əslində, şükür etməkdir. Keçmişin ağrılarına baxmayaraq, bu günə çatdığın üçün, qarşılaşdığın üçün, eyni göy üzünü paylaşdığın üçün şükürdür. Bu, varlığın özünə deyil, mənasına təşəkkürdür.
Fəlsəfə deyir ki, insan özünü başqa insanda tanıyır. Ruh isə deyir ki, insan özünü başqa ruhda tamamlayır. Bəzən bir insanın varlığı sənin susduqlarını danışır, dözdüklərini anlayır, səssiz dualarına cavab olur. Bu zaman anlayırsan: onun gəlişi təsadüf deyilmiş.
Zaman hər şeyi dəyişir, amma ruhun tanıdığı həqiqətlər dəyişmir. İllər keçsə də, yollar ayrılsa da, yaddaşdan silinməyən insanlar var. Çünki onlar bu dünyaya sadəcə yaşamaq üçün yox, iz buraxmaq üçün gəliblər.
Yaxşı ki, məni seçib bu dünyaya gəlmisən…
Yaxşı ki, bu zamanın içində, bu dünyanın sınaqlarında varlığınla bir mənaya çevrildin.
Yaxşı ki, ruhum səni tanıdı.

Hörmətlə və dərin duyğularla,
Pərvanə Salmanqızı