12 Mart – Azərbaycan Daxili Qoşunları Günü

Azərbaycan dövlətçiliyinin möhkəmlənməsi, ictimai sabitliyin və təhlükəsizliyin qorunması hər bir müstəqil dövlət üçün ən mühüm amillərdən biridir. Bu baxımdan Azərbaycan Respublikasının Daxili Qoşunları ölkəmizin təhlükəsizlik sistemində xüsusi yer tutan, dövlətçiliyin və ictimai asayişin keşiyində duran şərəfli hərbi qurumlardan biridir.
Məhz buna görə də Azərbaycan dövlətinin qurucusu, ümummilli lider Heydər Əliyev tərəfindən 1995-ci il 9 mart tarixli fərmanla hər il 12 mart günü Daxili Qoşunlar Günü kimi təsis edilmişdir. Bu qərar Azərbaycan Daxili Qoşunlarının dövlət və cəmiyyət qarşısında göstərdiyi xidmətlərin yüksək qiymətləndirilməsinin bariz nümunəsidir.
Daxili Qoşunların yaranması və inkişafı Azərbaycan dövlətçiliyinin mürəkkəb və çətin dövrləri ilə sıx bağlıdır. Müstəqilliyimizin ilk illərində ölkədə ictimai-siyasi sabitliyin təmin olunması, qanunçuluğun bərpası və dövlət institutlarının möhkəmləndirilməsi üçün bu qüvvələrin fəaliyyəti böyük əhəmiyyət kəsb edirdi. Daxili Qoşunların şəxsi heyəti daim yüksək peşəkarlıq, vətənpərvərlik və fədakarlıq nümayiş etdirərək dövlətimizin təhlükəsizliyinin təmin olunmasında mühüm rol oynamışdır.
Bu şərəfli xidmət yolu təkcə ictimai asayişin qorunması ilə məhdudlaşmamış, həm də Azərbaycanın ərazi bütövlüyünün müdafiəsi uğrunda aparılan mübarizədə özünü göstərmişdir. Vətən torpaqlarının müdafiəsi naminə Daxili Qoşunların igid əsgər və zabitləri böyük qəhrəmanlıqlar göstərmiş, onların bir çoxu Vətən uğrunda şəhidlik zirvəsinə ucalmışdır. Bu qəhrəmanlıq salnaməsi Azərbaycan xalqının yaddaşında əbədi yaşayır.
Daxili Qoşunlar dövlətin sabitliyinin, qanunun aliliyinin və vətəndaşların təhlükəsizliyinin təmin edilməsində mühüm rol oynayan güc strukturlarından biridir. Bu gün də onların fəaliyyəti müasir tələblərə uyğun şəkildə inkişaf edir, hərbi hazırlıq səviyyəsi yüksəldilir, texniki və taktiki imkanları daha da gücləndirilir. Bu isə Azərbaycan dövlətinin təhlükəsizlik siyasətinin güclü və etibarlı dayaqlara malik olduğunu göstərir.
12 Mart – Daxili Qoşunlar Günü yalnız bir peşə bayramı deyil. Bu gün həm də Vətənə sədaqətin, dövlətə xidmətin və vətəndaş təhlükəsizliyinə verilən böyük dəyərin rəmzidir. Bu əlamətdar tarix Azərbaycan dövlətinin gücünü, xalqın isə öz təhlükəsizlik qüvvələrinə olan etimadını ifadə edir.
Bu gün münasibətilə Azərbaycan Daxili Qoşunlarının bütün şəxsi heyətini ürəkdən təbrik edir, onlara şərəfli xidmət yollarında möhkəm iradə, sağlamlıq və yeni uğurlar arzulayırıq. Qoy onların xidmət yolu daim şərəf, ləyaqət və vətən sevgisi ilə işıqlansın.

Pərvanə Salmanqızı
Jurnalist, şair-publisist.