12 Noyabr – Azərbaycan Respublikasının Konstitusiya Günü

Azərbaycan dövlətçiliyinin tarixi inkişaf yolunda mühüm mərhələlərdən biri, xalqımızın siyasi iradəsini və müstəqillik əzmini əks etdirən ən ali sənəd – Azərbaycan Respublikasının Konstitusiyası 1995-ci il 12 noyabr tarixində ümumxalq səsverməsi (referendum) yolu ilə qəbul edilmişdir. Bu gün Azərbaycan tarixində Konstitusiya Günü kimi qeyd olunur və dövlət müstəqilliyimizin hüquqi təməlini formalaşdıran ən əlamətdar tarixlərdən biridir.

Azərbaycan Respublikasının Konstitusiyası ulu öndər Heydər Əliyevin rəhbərliyi ilə hazırlanmış və qəbul edilmişdir. O, yalnız hüquqi sənəd deyil, həm də xalqımızın azadlıq, ədalət və demokratik dəyərlər naminə apardığı uzunmüddətli mübarizənin məntiqi nəticəsidir. Müstəqil Azərbaycanın ilk Konstitusiyası, dövlətin siyasi, iqtisadi, sosial və mənəvi əsaslarını müəyyənləşdirən, insan hüquq və azadlıqlarını ən yüksək səviyyədə təmin edən ali qanun kimi tarixə yazıldı.

Konstitusiya – dövlətin sütunudur. O, cəmiyyətin bütün sahələrində qanunçuluğun, ədalətin və insan hüquqlarının təminatçısıdır. Azərbaycan Konstitusiyası da bu missiyanı uğurla daşıyır:

Dövlət hakimiyyətinin xalqdan qaynaqlandığını təsbit edir;

Hakimiyyət bölgüsü prinsipini – qanunverici, icraedici və məhkəmə hakimiyyətlərinin müstəqilliyini təmin edir;

Hər bir vətəndaşa söz, vicdan, din, mülkiyyət və sərbəst toplaşma azadlığı verir;

Azərbaycan dövlətinin suveren, demokratik, hüquqi, dünyəvi və unitar xarakterini müəyyən edir.

Bu Konstitusiya ilə Azərbaycan, dünya birliyində öz yerini tutan, hüquqi dövlət prinsiplərinə əsaslanan müasir və demokratik ölkə kimi formalaşmağa başladı. Heydər Əliyevin dövlətçilik fəlsəfəsi bu sənəddə özünün parlaq ifadəsini tapdı. O, hər bir vətəndaşın hüquq bərabərliyini, dövlətin xalq qarşısında məsuliyyətini və cəmiyyətin ədalətə əsaslanmasını təmin edən əsasları yaradaraq gələcək nəsillərə dərin hüquqi irs qoydu.

Bu gün müstəqil Azərbaycan Konstitusiyasının prinsipləri əsasında inkişaf edir, ədalət və hüquq üzərində qurulan sabit cəmiyyət modeli formalaşdırır. Prezident İlham Əliyevin rəhbərliyi ilə həyata keçirilən islahatlar da Konstitusiyanın ruhuna uyğun olaraq, dövlətin modernləşməsi, vətəndaş rifahının yüksəldilməsi və hüquqi dövlətin möhkəmlənməsinə yönəlmişdir.

Konstitusiya Günü – sadəcə bir tarix deyil, bu gün xalqın dövlətinə, qanununa və gələcəyinə olan inamının bayramıdır. Hər bir azərbaycanlı üçün bu gün, azadlığın, ədalətin, hüququn və milli birliyin rəmzidir.

Ulu öndər Heydər Əliyevin dediyi kimi:

 “Azərbaycan Respublikasının Konstitusiyası xalqımızın müstəqillik iradəsinin, dövlətçilik ənənələrinin və gələcəyə inamının hüquqi ifadəsidir.”

Bu müqəddəs sənəd əbədi olaraq Azərbaycan dövlətçiliyinin yol xəritəsi, xalqın birliyinin və milli iradəsinin simvolu kimi yaşayacaq.

İmza:Pərvanə Salmanqızı.