Mən qışın adamı ola bilmədim…
OLA BİLMƏDİM…
Sən getdin, bir gözəl çox baxdı mənə,
Baxışın adamı ola bilmədim.
Taleyim gülmədi heç vaxtı mənə,
“Naxışın” adamı ola bilmədim…
Baharın ətrini köksümə çəkdim,
Nərgiz, bənövşəni qapımda əkdim.
Qış fəsli baharsız tənhaydım, təkdim,
Mən qışın adamı ola bilmədim…
Yağış hər yağanda bağrımı yarır,
Vahimə yaradan səslər qoparır.
Qəlbimdən izini yuyub aparır,
Yağışın adamı ola bilmədim…
Əjdərəm, qəm–qüssə meydanı oldum,
Gözəl hər nə varsa, heyranı oldum.
Ucuz qarğışların qurbanı oldum,
Alqışın adamı ola bilmədim…
28.10.2025