Azərbaycan Respublikasının Dövlət Suverenliyi Günü Münasibətilə Bakı Dövlət Peşə Təhsil Mərkəzində Tədbir Keçirilib

Azərbaycan Respublikasının Dövlət Suverenliyi Günü Münasibətilə Bakı Dövlət Peşə Təhsil Mərkəzində Tədbir Keçirilib

20 sentyabr 2024-cü il tarixində Mədəniyyət və Sənətkarlıq üzrə Bakı Dövlət Peşə Təhsil Mərkəzində 20 sentyabr – Azərbaycan Respublikasının Dövlət Suverenliyi Günü münasibətilə təntənəli tədbir keçirilib. Tədbir çərçivəsində, həmçinin Qələbəyə həsr olunmuş, tələbələrin əl işlərindən ibarət sərgi təşkil edilib.

Tədbir Azərbaycan Respublikasının dövlət himninin səsləndirilməsi ilə başlayıb, daha sonra vətən uğrunda şəhid olan qəhrəmanlarımızın xatirəsi 1 dəqiqəlik sükutla yad edilib.

Tədbirin açılışında Mərkəzin direktoru Pərviz Həmzəyev çıxış edərək tədbir iştirakçılarını və tələbələri təbrik edib. O, sual-cavab formatında tələbələrlə ölkəmizin ən yeni və şərəfli tarixi barədə müzakirələr aparıb, daha sonra Azərbaycan Respublikasının Dövlət Suverenliyi Günü və onun əhəmiyyəti barədə geniş məlumat verib. Çıxışında Pərviz Həmzəyev 2020-ci il 44 günlük Vətən müharibəsinin Ermənistanın işğalçılıq siyasətinə və təxribatlarına cavab olaraq başladığını və Azərbaycan Silahlı Qüvvələrinin bu müharibədə tarixi Zəfər qazandığını vurğulayıb. O qeyd edib ki, Azərbaycan öz ərazi bütövlüyünü bərpa edərək beynəlxalq hüquqa uyğun olaraq BMT Təhlükəsizlik Şurasının qətnamələrinin icrasına nail olub.

Direktor həmçinin, 2023-cü ilin sentyabrında Qarabağ iqtisadi rayonunda törədilən təxribatlara cavab olaraq həyata keçirilən antiterror əməliyyatının uğurla başa çatdığını və nəticədə Azərbaycan Respublikasının suverenliyinin tam bərpa edildiyini bildirib.

Tədbir iştirakçıları daha sonra tələbələrin əl işlərindən ibarət sərgi ilə tanış olublar. Sərgi qonaqlar tərəfindən maraqla qarşılanıb və yüksək qiymətləndirilib. Tədbirdən fotolar.